यज्ञ, हवन, तप, दान करे तै लोग हंसाई होगी (सांग कृष्ण सुदामा)

यज्ञ, हवन, तप, दान, करे तै लोग हंसाई होगी ! दो मुटठी ना दाणे घर म्ह कती सफाई होगी ! (टेक) अगत का सामान करया था, आत्मा का ज्ञान करया था, हरिचन्द नै दान करया था, कोड तबाई होगी ! दो मुटठी ना दाणे घर म्ह कती सफाई होगी ! अपणा हिरदा नर्म करे तै, सबके दिल म्ह भर्म करे तै, नल राजा के कर्म करे तै, भौम पराई होगी ! दो मुटठी ना दाणे घर म्ह कती सफाई होगी ! पंचा म्ह पकड़या पल्ला, कोन्या करया राम नै भला, गौतम ऋषि की नार अहल्या, सती लुगाई होगी ! दो मुटठी ना दाणे घर म्ह कती सफाई होगी ! पांच आदमी तेरे सहारै, क्यूँ ना साजन बख्त बिचारै, मांगेराम सांग के बारै, सफल कमाई होगी ! दो मुटठी ना दाणे घर म्ह कती सफाई होगी !